O mundo da emigración

Proposta didáctica

Xustificación da nosa elección

Trala lectura do libro Stefano decidimos elaborar a nosa proposta didáctica sobre a emigración, tema principal desta obra.

Decantámonos por este, xa que consideramos que ten unha importancia fundamental na actualidade. A pesar de ser un tema complicado, xa que son moitos os factores que inflúen na vida dunha persoa emigrante, consideramos que é un feito ó que debemos achegar ós nenos posto que xa é unha realidade observable dentro das aulas, onde cada vez se atopa unha maior diversidade de culturas.

Non só pretendemos que comprendan que os emigrantes buscan unhas mellores condicións de vida, que se ven obrigados a fuxir dos seus países para atopar algo digno para eles e as súas familias, senón tamén que vaian vendo a diversidade cultural como algo positivo do que poder beneficiarse, podendo aprender así os uns dos outros. Tamén será beneficioso á hora de evitar futuras problemáticas de discriminación racial e para fomentar unha serie de valores como o a igualdade e o respecto.

Somos conscientes do serio e formal que pode resultar este tema, por isto imos abordar os aspectos básicos do mesmo sen profundizar demasiado, buscando a comprensión por parte dos nenos, resolvendo os interrogantes que se lles presenten e evitando xerar confusión nos mesmos.

Obxectivos da nosa proposta

-          Coñecer o significado de migración

-          Indagar sobre as causas e as consecuencias que provocan a migración

-          Promover a empatía

-         Establecer relacións de confianza, afecto, colaboración e comprensión entre os compañeiros

-          Potenciar os valores de respecto, formas de vida e diversidade cultural

-          Valorar positivamente os vínculos establecidos tanto na familia como na escola

-          Mellorar o dominio da linguaxe verbal

-          Perder o medo a expresar as opinións ante os demais compañeiros

Actividades

A nosa proposta está formada por un conxunto de cinco actividades ordenadas de tal xeito que a introdución dunha ven dada pola realización da anterior, é dicir, que todas elas están relacionadas. Así, comezamos coa primeira na que se lles introduce o tema da emigración ós nenos, para logo pasar a segunda e contarlles unha adaptación da historia de Stefano. A continuación pasaremos á terceira actividade na que se tratará de investigar sobre o tema coa axuda das familias, á cuarta na que representaremos aspectos da obra tratada e, por último, á quinta na que faremos un mural con todo o material recopiado.

Como expuxemos anteriormente as actividades precisan as unhas das outras, pois para contar un conto sobre a temática da emigración é importante antes tratar o tema e para facer a representación é preciso escoitar previamente a historia.

Actividade 1. ¡Comezamos falando!

A primeira actividade desta proposta será de achegamento ó tema da emigración. Levarase á aula unha caixiña que terá no seu interior unha serie de fotografías de xente marchando nun barco, persoas portando maletas, etc. Imaxes da emigración tanto de épocas antigas como de actualidade.

A continuación mostraranse ditas imaxes para que os nenos comenten o que ven en cada unha delas e a súa vez que expliquen o que lles suxiren, intentando conducilos ó tema a tratar a través de preguntas en caso de que sexa necesario (por exemplo: que significará a imaxe da maleta?, por qué están chorando o neno e o seu papá?, etc.).

Con esta actividade o que se pretende e introducirlle ós nenos o tema da migración, invitándoos a que observen as imaxes e reflexionen a través delas.

Actividade 2. Érase unha vez...

Tras isto lévase a cabo unha segunda actividade que consiste en contarlles ós nenos a historia de Stefano adaptada a súa idade. Desta maneira poderán entender a situación de migración pola que ten que pasar o personaxe, comprender o seu significado, e empatizar con el.

Da mesma maneira o propio conto da lugar a falar das situacións actuais, pois hoxe en día moita xente emigra para buscar ao igual que o protagonista unha vida mellor e cada. Ao poñerse na situación de Stefano evitamos que os alumnos desenvolvan pensamentos racistas e promovemos os valores de aceptación, de sociabilidade, de axuda ós demais, comprensión, diversidade e, especialmente, valorar os bens que temos, pois non todos contamos coas mesmas oportunidades.

Realizarase esta actividade dunha forma lúdica e amena buscando fomentar nos nenos o gusto pola lectura.

No seguinte enlace podedes ver o conto adaptado.
https://docs.google.com/presentation/d/120C02leHuFBYDcReaKpdj7Jxx1pubxy5qS2HU9nGYfU/edit?usp=sharing

Actividade 3. Investigadores

O conto abre a posibilidade de realizar unha tarefa de colaboración coas familias, na que se levará a cabo unha busca de información e unha recompilación de diversos materiais relacionados coa migración (fotografías, cartas, novas, etc.).

Sería unha boa idea que os nenos indagasen sobre os seus familiares, saber se algún emigrou do seu país de orixe. Compartir esas experiencias, curiosidades e historias enriquece tanto ós nenos, como ós mestres e tamén ós familiares, pois a parte de aprender sobre a emigración, é unha maneira de crear vínculos e de que os rapaces coñezan mellor os membros da súa familia, facéndoos partícipes en gran medida na educación dos seus fillos.

Así, unha vez que dispoñamos da información será exposta na aula, de xeito que todos poidan compartir o que descubriron cos demais compañeiros. Esta é unha forma de potenciar a comunicación entre os nenos ademais de outorgarlle protagonismo a cada un deles.

Actividade 4. Teatreiros           

Unha vez que indagamos sobre o tema levarase a cabo unha representación do conto de Stefano, de maneira que os nenos sexan capaces de comprender e interiorizar mellor a historia.

Para isto dividirase a clase en dous grupos, un deles representará dita historia e o outro fará de público. Esta actividade prolongarase ó longo da semana de xeito que cada neno asumirá os dous papeis (actor e espectador).

O que se pretende é que cada un deles teña un papel na obra, de xeito que a medida que a mestra vai narrando o conto cada un teña unha acción que desenvolver. Por exemplo, uns farán de emigrantes que se teñen que marchar e coller o barco que os levará ás Américas, outros terán o papel das familias que con pena despiden aos que emigran, outros nenos farán de campesiños que traballan no campo para gañar cartos, etc.

 Actividade 5. ¡Como artistas!

Como ultima actividade desta proposta crearemos un mural no que se poderá debuxar ou pegar imaxes de todo aquilo que aprenderon ata o momento, empregando toda a información recopiada coa axuda das familias. Tamén se poderán escribir as ideas que teñan acerca disto.

O que pretendemos con esta tarefa é que os nenos participen e que sexan conscientes de todo o aprendido. Ademais potenciarase a creatividade, posto que os nenos poderán empregar todo tipo de materiais dispoñibles, e o desenvolvemento da motricidade fina.

Conclusións

Pensamos que esta pequena proposta será de moita utilidade pola temática a tratar, xa que non é un tema común dentro das aulas de infantil a pesar de ter unha grande importancia na sociedade actual.

Pensamos que ó ser unha temática tanto de actualidade como de tempos pasados é importante tratala e introducila dende a etapa de infantil, sempre adaptada ás idades e características particulares dos nenos.

Para o noso parecer é algo fundamental e que deben coñecer, posto que é unha problemática da que todos os días saen noticias e que está a orde do día. Son temas que os adultos ás veces tratamos de ocultarlles ós nenos, ou simplemente os evitamos xustificándonos como que non o comprenderían. Hoxe en día sabemos que non é así, e que facendo as adaptacións pertinentes calquera temática se pode traballar cos pequenos.

En canto ó alumnado, cremos que esta proposta pode resultarlles bastante divertida por ser dinámica e amena e permitir a participación activa en cada unha das actividades: na actividade do mural, na de coñecementos previos coas fotografías, etc. Ademais aprenderán aspectos dun tema importante de forma lúdica e motivadora, que os enriquecerá e lles axudará a medrar como persoas.

Entrada escrita por:

Eva Pérez González

Alba Argerey Castro 

Noa Prado Souto 

Olga Barreira Alonso

Andrea Callejo López