O caderno de agosto infantil

Como proba de que a literatura non atende a idades e etiquetas clasificatorias, a continuación suxerimos unha breve secuencia de actividades para traballar a obra de Alice Vieira, Caderno de Agosto, nunha aula de infantil.

O tren das emocións

Na citada novela xuvenil descubrimos o diario de Gloria (unha rapaza de quince anos), que máis alá de relatar o quefacer diario, expresa os seus sentimentos e emocións.

Coa finalidade de adaptar o libro ao universo infantil propoñemos unha actividade denominada “o tren das emocións”. Para levar a cabo a mesma, deseñamos un tren composto por diversos vagóns (tantos como alumnos e alumnas haxa na aula) que, posteriormente, serán personalizados co seu nome e fotografía. Así mesmo, poremos a disposición do alumnado unha cesta con diferentes caras que representarán as emocións (tristeza, ledicia, enfado, entre outras) e así, cada día, os pequenos e pequenas colocarán no vagón as imaxes correspondentes co seu estado anímico.

O obxectivo que se persegue con este exercicio é identificar e expresar os sentimentos (tanto os propios como os dos membros do noso entorno). Ademais, vai permitir á mestra ou mestre coñecer o estado no que se atopa o grupo en xeral e cada menor en particular.

O cadernos dos soles

A segunda proposta chámase “Caderno dos soles”, facendo alusión a suposta denominación do noso grupo clase “os soles”. De novo, baseándonos no diario de Gloria, realizaremos un caderno de aula ou libro viaxeiro que constará de dúas partes:

Na primeira, cada neno e nena (coa axuda dos seus pais) deberá escribir o seu nome e explicar os motivos polos que se chama así. Do mesmo xeito, poderá indicar as súas principais virtudes e engadir unha fotografía. Para a súa elaboración tomaremos como referencia os fragmentos da obra  de Alice Vieira nos que se xustifican os porqués de cada nome:

“Chámome María da Gloria por causa de Dª María II […] <<unha das personaxes femininas máis dramáticas da Historia de Portugal>>” (páx. 25-26).

 “O Fabio chamábase así porque naceu nunha época en que botaban na televisión unha telenovela con Fabio Junior, e a tía Benedita decidiu, despois de media ducia de episodios, que non había mellor nome para o seu primoxénito.” (páx. 22).

 “Meu irmán chámase Antonio por motivos moito menos intelectuais ou aristocráticos: naceu na noite do 12 para o 13 de xuño” (páx. 26).

Finalmente, na segunda parte, pediremos ó alumnado que complete o caderno cunha imaxe do seu lugar preferido. Para elo, empregaremos a afección dunha das personaxes da novela (Mónica) polas viaxes:

“Nunca lle ía dicir que compraba todos os meses unha revista onde só falaba de viaxes, de itinerarios sorprendentes, de fotografías que ela recortaba e espallaba polas paredes do cuarto.” (páx. 98).

Un dos obxectivos xerais da actividade é propiciar o coñecemento mutuo e a cohesión grupal. Por iso, consideramos que o inicio do curso escolar pode ser un momento óptimo para o seu  desenvolvemento.

Clasifica os alimentos 
Finalmente, a última proposta é unha actividade interactiva elaborada co editor de contos Edilim. Nela os nenos e nenas terán que clasificar seis imaxes segundo correspondan a comida ou bebida, servíndose da axuda do rato.

Para a súa realización, inspirámonos no personaxe de Teotonio (un dos mozos da nai da protagonista), por estar un pouco obsesionado coa comida saudable:

“Bebemos litros e litros de infusións” (páx. 101)

“Comiamos saladas, legumes cocidos ao vapor, pan integral, froita, mel de uz, sopas, falopas de cereais, enriquecidos con farelo.” (páx. 104)

Este exercicio serviríanos para traballar o uso das TIC en educación infantil, pois pódese realizar por quendas en parellas ou en grande grupo, empregando o ordenador e o proxector ou o taboleiro dixital da aula. 

file:///C:/Users/Usuario/AppData/Local/Temp/Rar$EX00.018/clasifica_os_alimentos.html

Como conclusión, indicar que escollemos estas actividades porque creemos que tendo en conta a complexidade da obra, son doadas de levar a cabo con nenos/as de Educación Infantil, e eliximos eses temas en concreto porque consideramos que son puntos de interese pretos a eles/as, xa que son tarefas que se realizan a miúdo na maioría das aulas desta etapa. 

Polo tanto, creemos que os nosos alumnos/as poderían traballar de maneira eficaz coas propostas presentadas.

Entrada realizada por:

González Fernández, Sonia

Tajes Fernández, Ángela

Val Leiro, Olaya

Twitter: @Cadernodeagosto